Isroilning G‘azodagi tajovuzi qurbonlari soni 60 mingdan oshdi

So‘nggi 24 soat ichida eksklavning 119 nafar aholisi halok bo‘ldi.

Foto: Mahmoud Abu Hamda

Isroilning G‘azo sektorida 2023 yil 7 oktyabrdan beri davom etayotgan tajovuzi qurbonlari soni 60 839 nafarga yetdi. Bu haqda G‘azo sektoridagi Falastin sog‘liqni saqlash vazirligi bayonotida ma’lum qilindi.

Bayonotga ko‘ra, so‘nggi 24 soat ichida eksklavning 119 nafar aholisi halok bo‘lgan, yana 866 nafari jarohatlangan.

Isroilning 2023 yil 7 oktyabrdan beri uyushtirgan hujumlari natijasida jami 149 588 kishi jarohatlandi.

18 mart kuni Isroil armiyasi 19 yanvarda HAMAS bilan kelishilgan o‘t ochishni to‘xtatish kelishuvini buzdi va G‘azo sektoriga yana ommaviy hujumlarni boshladi. O‘shandan beri hujumlar natijasida 9350 kishi halok bo‘ldi, yana 37 547 kishi yaralandi.

27 maydan buyon 1487 falastinlik AQSh va Isroil tomonidan boshqariladigan «G‘azo gumanitar yordam jamg‘armasi» tashkil etgan yordam tarqatish punktlariga uyushtirilgan hujumlar natijasida halok bo‘ldi, 10 578 nafari yaralandi.

Minglab halok bo‘lganlarning jasadi eksklavdagi vayron bo‘lgan binolar ostida qolmoqda.

#Isroil #Falastin #G‘azo

2023 yil 7 oktyabr kuni G‘azo bo‘lgasidagi Hamas kuchlari Isroilga yoppasiga raketa zarbalari berib, chegaradagi aholi punktlarini egallay boshladi. Bunga javoban Isroil qo‘shinlari G‘azo bo‘lgasiga bostirib kirdi. Bu safargi eskalatsiya avval kuzatilmagan darajada ko‘p qurbonlarga olib keldi.