Malayziya O‘zbekistonda bioreaktor tizimiga birinchi zavodni qurishi mumkin

Muloqot avvalida Leonid Nikishov Imago Engineering kompaniyasi faoliyati va ishlab chiqilgan parrandachilik chiqindilarini qayta ishlashning innovatsion texnologiyalari to‘g‘risida ma’lumot berdi. Uning aytishicha, kompaniya parranda chiqindisini xonaki pashsha lichinkalari yordamida qayta ishlash orqali hasharot oqsili va organik o‘g‘itlar ishlab chiqaradi.

"Bu noyob texnologiya parrandachilik sanoatidan chiqadigan katta miqdordagi issiqxona gazlari va ferma atrofidagi yoqimsiz hidlarni kamaytirish imkonini beradi. Qayta ishlash zavodida barcha texnologik jarayonlar masofadan boshqariladi va ular turli o‘lchamdagi parrandachilik fermalariga moslasha oladi", – dedi Leonid Nikishov.

Malayziya tomoni o‘zi yaratgan texnologiya asosida to‘liq avtomatlashtirilgan va yopiq bioreaktor tizimi bilan jihozlangan birinchi zavodni O‘zbekistonda qurishga qiziqish bildirdi.

Imago Engineering Sdn. Bhd. rahbari, shuningdek, O‘zbekiston tomoni bilan hamkorlikda ushbu loyihaga sarmoya kiritish va uni davlat-xususiy sherikchilik asosida amalga oshirishga tayyorligini ma’lum qildi.