Ҳолат юқори синф ўқувчилари ўртасида юзага келган ўзаро жанжалда содир бўлган. Ҳолат юзасидан жиноят иши қўзғатилган.
Тошкент вилояти Зангиота туманида жойлашган мактабда Миллий гвардия ходимига жароҳат етказилган. Миллий гвардия матбуот хизматининг хабар беришича, ҳодиса 2024 йил 1 март куни туш пайтида содир бўлган.
Маълум қилинишича, Зангиота тумани, “Боғишамол” МФЙдаги 4-сонли мактабда хизмат вазифасини бажараётган Миллий гвардия ходими юқори синф ўқувчиларининг мактабни орқа тараф ҳовлисида ўзаро жанжаллашаётганини кўриб қолиб, ҳолатни бартараф этишга киришган.
Шу вақтда профилактика инспектори ҳам етиб келиб, Миллий гвардия ходими билан биргаликда ўқувчиларни тинчлантиришга киришганда, ушбу мактабнинг 10-синф ўқувчиси М.Б.нинг чақируви билан ташқаридан етиб келган акаси ҳамда унинг икки шериги ходимларнинг огоҳлантиришига қарамасдан жанжалга аралашган.
Жанжаллашаётганларнинг хатти-ҳаракатларини ва қаршиликларини тўхтатиш чорасини кўрган Миллий гвардия ходимига шу жойда тан жароҳати етказилган.
Мактабдаги ташвиш тугмаси орқали чақирилган ҳамда тезкорлик билан етиб келган Қўриқлаш тезкор гуруҳи томонидан ҳолат тўлиқ бартараф этилган ҳолда Миллий гвардия ходимининг хизмат вазифасини бажаришига қаршилик қилганлар қўлга олиниб, туман ички ишлар бўлимига топширилган.
Дастлабки суриштирувда ташқаридан мактаб ҳудудига кириб, жанжалга аралашган ва ходимларга фаол қаршилик кўрсатган фуқаро ушбу мактабнинг 10-синф ўқувчиси М.Б.нинг акаси Зангиота туманида истиқомат қилувчи 20 ёшли И.Б. экани маълум бўлган.
Қайд этилишича, мазкур ҳолат бўйича Зангиота тумани прокуратураси томонидан Жиноят кодексининг 219-моддаси 2-қисми (Ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилиб, фуқаро И.Б. ЖПКнинг 221-моддаси асосида ушланган. Унга нисбатан эҳтиёт чорасини танлаш ҳақидаги масала ҳал қилинмоқда.
Шунингдек, ушбу ҳолат юзасидан жиноятга алоқадор бўлган бошқа шахсларни аниқлаш борасида ҳам тергов ҳаракатлари давом эттирилмоқда.
Маълумот учун, феврал ойи бошларида президент бошчилигида ўтказилган йиғилишда тарбия ва маънавият мактаблардаги оғриқли масалалардан бири эканлиги қайд этилган. Мактаблардаги инспектор-психологлар штати ИИВдан Миллий гвардия тизимига ўтказилиши айтилганди. Ўшандан буён мактаблардаги вазиятни Миллий гвардия томонидан бириктирилган ходимлар назорат қилмоқда.
