O‘zbekiston Pokistondagi neft va gaz konlarini qidirishga jalb etilishi mumkin

Suhbat chog‘ida ikki mamlakatda neft-gaz sohasidagi jarayonlar, ushbu sohadagi o‘zaro hamkorlikning amaldagi holati va istiqbolli qo‘shma loyihalar muhokama qilindi.

Vazir Ali Pervez Malik O‘zbekistonning neft va gaz sohasidagi tajribasini yuqori baholab, energetika sohasi ikki davlat o‘rtasidagi ustuvor hamkorlik yo‘nalishlaridan biri ekanini va bu yo‘nalishdagi hamkorlikdan ikki tomon ham manfaatdorligini ta’kidladi.

Mazkur sohadagi mavjud salohiyat va imkoniyatlarni chuqur o‘rganish, istiqbolli loyihalarni birgalikda ishlab chiqish va aniq yo‘nalishlar bo‘yicha amaliy harakatlarni boshlash yuzasidan ustuvor vazifalar belgilab olindi. Jumladan, ikki davlat mutasaddi vazirliklari darajasida mutaxassislardan iborat ishchi guruh tuzish zarurligiga alohida urg‘u berildi.

Pokiston milliy iqtisodiyotida neft-gaz mahsulotlariga talabning yuqoriligi, katta miqdorda suyultirilgan uglevodorod gazi, siqilgan tabiiy gaz va qayta ishlangan neft mahsulotlari import qilinishi qayd etildi. Bu borada barqaror va uzoq muddatli kooperatsiya uchun qulay sharoit mavjudligi e’tirof etilib, tegishli tashkiliy masalalarni batafsil o‘rganib chiqib, qo‘shma taklif ishlab chiqish zarurligi ta’kidlandi.

Pokiston hududidagi neft va gaz konlarini qidirish va o‘zlashtirish, xususan, qazib olish hamda neftni qayta ishlash zavodlarini modernizatsiya qilish loyihalariga o‘zbek hamkorlarni jalb etish masalalariga ham alohida to‘xtalib o‘tildi.

Tomonlar, shuningdek, geologik ma’lumotlar almashinuvi, sohaga oid zamonaviy texnologiyalar borasida tajriba almashish, mutaxassislar tayyorlashda hamkorlik qilish, o‘quv dasturlarini tashkil etish bo‘yicha takliflarni ham ko‘rib chiqdi.