Ozarboyjon Rossiya bilan ziddiyat kuchayishini istamaydi – Erdo‘g‘an

Turkiya prezidenti Rajab Toyyib Erdo‘g‘an ozarboyjonlik hamkasbi Ilhom Aliyev o‘z mamlakati bilan Rossiya o‘rtasida yuzaga kelgan kelishmovchiliklarni bartaraf etish tarafdori ekanini aytdi. Uning so‘zlariga ko‘ra, bu haqda Ozarboyjon prezidenti yaqinda bo‘lib o‘tgan uchrashuvda ma’lum qilgan.

«U ta’qiblar va bu masalani keskinlashtirish tarafdori emas. Men buni Ilhomning bayonotlaridan tushundim», dedi Erdo‘g‘an.

Turkiya prezidentining aniqlik kiritishicha, Iqtisodiy hamkorlik tashkiloti sammiti doirasida Ilhom Aliyev bilan uchrashuv kun tartibiga Boku va Moskva munosabatlari masalasi kiritilgan.

«Biz konstruktiv qadamlarni qo‘llab-quvvatlashda davom etamiz... Kavkaz endi yangi mojaroga toqat qila olmaydi», deb ta’kidladi Erdo‘g‘an.

Uning qo‘shimcha qilishicha, Turkiya keskin vaziyatni diqqat bilan kuzatib bormoqda va tomonlarni munosabatlarga «tuzatib bo‘lmaydigan zarar yetkazishning» oldini olishga chaqiradi.

Iyun oyi oxirida Rossiyaning Yekaterinburg shahrida bir necha ozarbayjonlik qo‘lga olindi, ular qotillikda ayblanmoqda. Operatsiya shafqatsiz o‘tdi, qo‘lga olish paytida aka-uka Ziyoddin va Husayn Safarovlar halok bo‘ldi. Ozarboyjon hukumati voqeani qoralab, Rossiyadan aybdorlarning javobgarlikka tortishni talab qildi.

Bir necha kundan so‘ng, Bokudagi «Sputnik Azerbaydjan» axborot agentligi tahririyatida tintuv o‘tkazilib, agentlik rahbari Igor Kartavix va bosh muharrir Yevgeniy Belousov qo‘lga olindi. Ular giyohvand moddalarning noqonuniy savdosi va kiberjinoyatchilikda gumon qilinmoqda.

Keyinroq, Rossiya va Ozarboyjonda shunga o‘xshash hibslar to‘lqini boshlanib ketdi.