Mers Tramp bilan Ukraina havo mudofaasini kuchaytirishni muhokama qildi

Germaniya kansleri Fridrix Mers 4 iyul, juma kuni ertalab AQSh prezidenti Donald Tramp bilan telefon suhbatida Oq uy rahbarini Ukrainaga harbiy yordamni davom ettirishga chaqirdi. Boshqa masalalar qatorida Ukraina havo mudofaasini kuchaytirish imkoniyatlari muhokama qilindi, deb yozadi Germaniyaning Der Spiegel haftalik nashri.

Bu ma’lumotni Reuters agentligiga Germaniya hukumati rasmiy vakili Shtefan Kornelius tasdiqladi. Uning jurnalistlarga aytishicha, Germaniya Rossiyadan o‘qqa tutishning kuchayishi fonida Ukraina havo mudofaasini kuchaytirish uchun AQShdan Patriot qurilmalarini sotib olish imkoniyatini ko‘rib chiqmoqda. Der Spiegel nashri yozishicha, telefon orqali suhbat chog‘ida Tramp Mersga hech qanday va’da bermagan. Bundan tashqari, haftalik xabariga ko‘ra, Germaniya kansleri va Amerika prezidenti xalqaro savdo masalalarini muhokama qilgan.

Birozdan keyin AQSh prezidenti ukrainalik hamkasbi Volodimir Zelenskiy bilan telefon orqali gaplashdi. Zelenskiy bu suhbatni «muhim va samarali» deb atadi. Uning so‘zlariga ko‘ra, tomonlar «havo hujumidan mudofaa masalalarini muhokama qilib, Ukraina osmonini himoya qilishni kuchaytirish ustida ishlashga kelishib oldi».

Bundan tashqari, mudofaa mahsulotlarini birgalikda ishlab chiqarish va sarmoya kiritish imkoniyatlari muhokama qilindi. «Biz AQSh bilan to‘g‘ridan to‘g‘ri hamkorlik qilishga tayyormiz va bu xavfsizlik uchun, ayniqsa, uchuvchisiz uchoqlar va unga aloqador texnologiyalarga nisbatan juda muhim, deb hisoblaymiz», dedi Ukraina prezidenti.