Xorazmda fuqaro oqlanganidan so‘ng ham 207 kun qamoqda o‘tirdi. Xatolikka yo‘l qo‘ygan sudyalarga “hayfsan” berildi 

Xorazm viloyatida fuqaro sudyaning qo‘pol xatosi tufayli 8 oy jazoni ijro etish muassasasida asossiz saqlangani aniqlandi. Kun.uz bunga sabab bo‘lgan taftish instansiyasi ajrimini o‘rgandi.

Ma’lum bo‘lishicha, fuqaro Rustam Xo‘janiyozov va boshqalar (jami 4 kishi) bir nechta epizodda savdo do‘koni oldida turgan yog‘ mahsulotlarini o‘g‘irlaganlikda ayblangan. Ularning barchasi 2023 yil oktyabr oyida ushlanib, qamoqqa olish tarzidagi ehtiyot chorasi qo‘llangan.

Ish sudga chiqqan. Jinoyat ishlari bo‘yicha Urganch shahar sudining 2024 yil 29 martdagi hukmi bilan Rustam Xo‘janiyozov Jinoyat kodeksining 169-moddasi 3-qismi “a” bandi (o‘g‘rilik takroran yoki xavfli retsidivist tomonidan sodir etilishi) bilan aybli deb topilgan. Unga 3 yil muddatga ozodlikdan mahrum qilish jazosi tayinlangan.  

Xorazm viloyati sudi jinoyat ishlari bo‘yicha sudlov hay’ati apellyatsiya instansiyasining 2024 yil 3 maydagi ajrimi bilan birinchi instansiya sudi hukmi o‘zgarishsiz qoldirilgan.

Jinoyat ishi Xorazm viloyati sudi jinoyat ishlari bo‘yicha sudlov hay’ati taftish instansiyasida ko‘rib chiqilgan. Taftish instansiyasining 2024 yil 22 iyuldagi ajrimi bilan birinchi instansiya sudi hukmining Rustam Xo‘janiyozovga oid qismi o‘zgartirilgan. Ya’ni Rustam Xo‘janiyozov Jinoyat kodeksining 169-moddasi 3-qismi “a” bandi bilan qo‘yilgan ayblov epizodlarida qayd etilgan jinoyatni sodir etganlikda aybsiz deb topilgan. Ushbu ayblov epizodlari yuzasidan Rustam Xo‘janiyozovning harakatlarida jinoyat tarkibi yo‘qligi munosabati bilan u oqlangan hamda jinoyat ishining shu qismi tugatilgan.

Ajrimda Rustam Xo‘janiyozovni MJtKning 61-moddasi 1-qismi bilan ma’muriy javobgarlikka tortish masalasi bo‘yicha tegishli hujjatlar IIBga yuborilishi belgilangan. Biroq taftish instansiyasi ajrimida Rustam Xo‘janiyozovga nisbatan qo‘llangan qamoqqa olish tarzidagi ehtiyot chorasini bekor qilib, uni jazoni ijro etish muassasasidan darhol ozod qilish yozilmay qolgan. Buning oqibatida Rustam Xo‘janiyozov asossiz ravishda jazoni ijro etish muassasasida 207 kun saqlangan.

Oqlanganini Rustam Xo‘janiyozovning na o‘zi, na yaqinlari bilmagan. Chunki ajrimda sudlov hay’ati uning shikoyatidagi ozodlikdan mahrum qilish bilan bog‘liq bo‘lmagan jazo tayinlash haqidagi vajlari bilan kelishmasligi keltirilgan hamda shikoyatni qanoatlantirish rad etilgan.

Sudyalar Oliy kengashi matbuot xizmatining Kun.uz’ga ma’lum qilishicha, holat yuzasidan xizmat tekshiruvi o‘tkazilgan hamda sudyaning ushbu xatosi o‘z tasdig‘ini topgan. Ishni taftish instansiyasida ko‘rgan 3 nafar sudyaga nisbatan xayfsan intizomiy jazo chorasi qo‘llangan. Ishni ko‘rishda raislik qilgan Ulug‘bek Bakdurdiyev prezidentning 2025 yil 23 iyundagi farmoyishi bilan yozma arizasiga asosan Xorazm viloyat sudi raisining o‘rinbosari – jinoyat ishlar bo‘yicha sudlov hay’ati raisi lavozimidan ozod etilgandi.