YeIning qator davlatlari Isroil aholi punktlari bilan savdo qilmaslikni talab etmoqda

Isroilning harakatlarini tanqid qilgan Yevropa Ittifoqining to‘qqiz mamlakati bosib olingan hududlardagi yahudiy aholi punktlari bilan savdoga qarshi qat’iy choralar ko‘rishga chaqirdi. Yevropaning Euractiv axborot sayti tomonidan 19 iyun, payshanba kuni chop etilgan xabarga ko‘ra, Belgiya, Irlandiya, Ispaniya, Lyuksemburg, Polsha, Portugaliya, Sloveniya, Finlandiya va Shvetsiya Yevropa Ittifoqining tashqi ishlar va xavfsizlik siyosati bo‘yicha oliy vakili Kaya Kallasga qo‘shma maktub yo‘lladi, unda G‘arbiy sohilda savdo munosabatlarini to‘xtatish rejasi bilan aniq kelishuv talablarini o‘z ichiga oladi.

«Bu Yevropa Ittifoqi siyosati to‘g‘ridan to‘g‘ri yoki bilvosita noqonuniy vaziyatni saqlab qolishga hissa qo‘shmasligini ta’minlash bilan bog‘liq», deyiladi Euractiv tomonidan qo‘lga kiritilgan to‘qqizta vazirning maktubida. Xabar Belgiya tomoni tashabbusi bilan chiqarildi, deya aniqlik kiritadi nashr. Maktub Kallasga Yevropa Ittifoqi tashqi ishlar vazirlari uchrashuvidan biroz oldin yuborilgani ta’kidlandi. 23 iyun kungi uchrashuvda vazirlar isroillik siyosatchilar va «radikal ko‘chmanchilar»ga qarshi sanksiyalarni muhokama qilish niyatida.

«Yevropa Ittifoqi Isroilning eng yirik savdo sherigi bo‘lib qolmoqda, o‘tgan yilgi savdo hajmi 42,6 milliard yevroni tashkil etdi. Biroq, bu savdoning qaysi qismi bosib olingan hududlardagi Isroil aholi punktlari mahsulotlarini o‘z ichiga olgani noma’lumligicha qolmoqda», — deya qayd etadi Euractiv.