“Efirda uzilish va qotish bo‘lgan” – Samarqand va Andijondagi attestatsiya jarayonlari yuzasidan munosabat bildirildi

O‘zbekiston bo‘ylab hozirda maktab o‘qituvchilari uchun malaka sinov imtihonlari o‘tkazilmoqda. Tarmoqlarda Samarqand viloyatida testda qatnashib chiqqan nomzodning onlayn efirda hali ichkarida o‘tirgani va bunga boshqa pedagoglarning noroziligi aks etgan video tarqaldi. Andijonda esa boshqa nomzodning telefondan foydalangani e’tirozlarni keltirib chiqardi.

Mazkur holatlar yuzasidan Maktabgacha va maktab ta’limi vazirligi rasmiy izoh berdi. Unga ko‘ra, Samarqandda toifa sinovlari o‘tkaziladigan bino ichidagi kuzatuv kameralarining onlayn efiri uzatiladigan saytda uzilishlar yuzaga kelgan.

Vazirlik sayt RsP protokolini qo‘llab-quvvatlamagani uchun videooqim maxsus kodirovka orqali uzatilishini, translatsiya tizimida har 15 soniyada yangilanadigan video kadrlar saqlanishini aytib, sayt kompyuter brauzerida ochilgach, ko‘rsatilayotgan barcha kadrlar kesh xotirada (ya’ni vaqtinchalik xotirada) qolishini bildirgan.

“Agar internet aloqasi uzilsa, brauzer avtomatik ravishda oxirgi uzilmasdan avval ko‘rsatilgan kadrlarni ko‘rsatishda davom etadi. Bu muammoni bartaraf etish uchun sahifani oddiygina yangilash (refresh qilish) yetarli bo‘ladi. Yuqoridagi holatda esa, interaktiv panelda internet aloqasi uzilgan va natijada eski, ya’ni uzilishdan oldingi kadrlar ekranga chiqqan.

Ilova qilingan rasmdan ko‘rinib turibdiki, ushbu nomzod 52 ball to‘plab attestatsiyadan o‘ta olmagan. Shuningdek, nomzodning test jarayonida olingan rasmlari va u sinovdan ketgandan keyingi holatni ko‘rishingiz mumkin (butun jarayonning to‘liq videosi ham mavjud va u 1 yil davomida saqlanadi”,– deyiladi rasmiy xabarda.

Ikkinchi holatda esa rasmiylar telefondan foydalangan nomzodning natijalari hodisa aniqlangan kun, ya’ni 19 aprel kuni bekor qilinib, u chetlashtirilganini ta’kidlashgan.

Qo‘shimcha qilinishicha, hozirgacha toifa sinovlarida aloqa qurilmalaridan yoki boshqa vositalardan foydalangan jami 24 nafar nomzod jarayondan chetlashtirilgan.