O‘zbekiston FIFA reytingida yuqoriladi

FIFA rasmiy sayti 2025 yil mart oyi yakunlariga ko‘ra milliy jamoalar reytingini yangiladi. Unga ko‘ra, O‘zbekiston milliy jamoasi reytingda bir pog‘ona ko‘tarilib, 57-o‘rinni egalladi.

Bu milliy jamoa uchun so‘nggi 9 yillikdagi eng yaxshi natijadir. Bungacha jamoa 2016 yilda Samvel Babayan boshqaruvi davrida reytingda 48-o‘ringacha chiqqandi.

Joriy yil yanvaridan Timur Kapadze bosh murabbiylik qilayotgan jamoa mart oyida JCh-2026 saralash bosqichida Qirg‘iziston ustidan g‘alaba qozondi (1:0), Eron bilan safarda durang natija (2:2) qayd etdi.

JCh saralashi doirasida noyabr oyida Qatarga yutqazgan (2:3) va KXDR ustidan g‘alabaga erishgan (1:0) jamoa 2024 yilni reytingda 58-o‘rinda yakunlagandi.

FIFA reytingida Argentina milliy jamoasi 1-o‘rinda bormoqda, Ispaniya Fransiyani (3-o‘rin) ortda qoldirib, 2-o‘ringa ko‘tarilgan. Keyingi o‘rinlarni Angliya, Braziliya, Niderlandiya, Portugaliya, Belgiya, Italiya va Germaniya band etgan.

Osiyo jamoalari orasida O‘zbekiston vakillari 6-o‘ringa ko‘tarildi. Yaponiya qit’ada peshqadam sanaladi (15-o‘rin). Osiyo vakillari orasida kuchli o‘nlikdan shuningdek Eron (18), Janubiy Koreya (23), Avstraliya (26), Qatar (55), Iroq, Saudiya Arabistoni (58), Iroq (59), Iordaniya (62) va BAA (65) jamoalari bor.

Ma’lumot uchun, O‘zbekiston milliy jamoasining FIFA reytingidagi eng yaxshi natijasi – 45-o‘rin bo‘lib, bu 2006-2007 yillarda qayd etilgan.