AQSh Milliy xavfsizlik kengashining qator yuqori martabali amaldorlari lavozimdan olindi

AQSh Milliy xavfsizlik kengashining bir nechta yuqori martabali amaldori 3 aprel kuni egallab turgan lavozimlaridan ozod etildi, deb xabar bermoqda Reuters.

«Vaziyatdan xabardor uch kishining so‘zlariga ko‘ra, payshanba kuni ertalab Oq uy huzuridagi Milliy xavfsizlik kengashining bir nechta direktori lavozimdan bo‘shatilgan», — deyiladi xabarda.

Agentlik manbalari mas’ullarning ishdan bo‘shatilishiga nima sabab bo‘lganini aytmagan, ammo ikki suhbatdosh mazkur holatni xodimlarga nisbatan tekshiruv natijalariga bog‘lagan. Ta’kidlanishicha, lavozimdan olingalar orasida texnologiya va milliy xavfsizlikka mas’ul katta direktor Devid Feyt ham bor.

So‘nggi bir necha hafta ichida Donald Tramp jamoasi faoliyati bilan bog‘liq bir nechta mojaro yuz berdi. Ikkita voqea AQSh prezidentining milliy xavfsizlik bo‘yicha maslahatchisi Mayk Uols bilan bog‘liq. Avvaliga u Yamandagi husiylarga beriladigan zarbalarga oid maxfiy ma’lumotlar tarqalib ketishiga aralashib qoldi, keyin esa uning yordamchilari harbiy masalalarni muhokama qilishda Gmail pochta manzilidan foydalanib kelgani ma’lum bo‘ldi. Shundan keyin OAV ma’lumotlariga ko‘ra, ma’muriyatdagi ayrimlar uning iste’fosini talab qilgan.

Avvalroq Mayk Uols Signal messenjeridan Rossiya—Ukraina urushini tinch yo‘l bilan hal etish masalasini muhokama qilishda ham foydalangani ma’lum bo‘lgan edi.