3 aprel yangiliklari: O‘zbekistonda ro‘y bergan muhim voqea va hodisalar

Samarqandda Yevropa rahbarlari bilan uchrashuv, kelgusida boylarga solinadigan soliq, Belgiyadan O‘zbekistonga qaytariladigan pullar va chigirtka tarqalishidan ogohlantirish — o‘tgan kun davomida Kun.uz’da yoritilgan dolzarb va muhim O‘zbekiston yangiliklari bilan tanishtiramiz.

Mirziyoyev YeI yetakchilari bilan uchrashdi

Shavkat Mirziyoyev Samarqandda Yevropa kengashi prezidenti Antoniu Koshta va Yevropa komissiyasi raisi Ursula fon der Lyayyen bilan uchrashdi. Tomonlar savdo, investitsiya va logistika sohalarida hamkorlikni kengaytirishga kelishib oldi.

Muzokarada 30 mlrd yevrolik qo‘shma loyihalar portfeli, Yevropa tiklanish va taraqqiyot banki va Yevropa investitsiya banki bilan munosabatlar muhokama qilindi. Kengaytirilgan sheriklik bitimi tayyorlanayotgani ta’kidlandi.

Yevropa rahbarlari O‘zbekistondagi islohotlar va mintaqada yaxshi qo‘shnichilik siyosatiga yuqori baho berdi.

Uchrashuvda «yashil» energetika, raqamlashtirish, qishloq xo‘jaligi va ta’lim sohalarida hamkorlik istiqbollari muhokama qilindi. «Markaziy Osiyo – Yevropa Ittifoqi» sammiti va «Global darvoza» strategiyasi kun tartibiga alohida e’tibor qaratildi.

Eslatib o‘tamiz, Samarqand shahrida «Markaziy Osiyo – Yevropa Ittifoqi» birinchi sammiti va Xalqaro iqlim forumi bo‘lib o‘tadi. Allaqachon qo‘shni davlatlar prezidentlari ham sammit va forumda qatnashish uchun Samarqand shahriga yetib kelishgan.

Boylarga soliq: alohida tizim ishlab chiqilyapti

O‘zbekistonda eng yuqori daromadli fuqarolar uchun soliq undirish bo‘yicha maxsus tizim joriy etilishi rejalashtirilmoqda. Bu haqda Soliq qo‘mitasi raisining birinchi o‘rinbosari Mubin Mirzayev ma’lum qildi.

Unga ko‘ra, 18 mln nafar fuqaro daromad oluvchi hisoblanadi va ular orasida daromadi yuqori bo‘lganlar alohida nazoratga olinadi. Yaratilgan elektron baza orqali soliqdan qochishning oldi olinadi.

Yangi tizim chet elda topilgan daromadlarni ham qamrab oladi. Qo‘mita bu tizimni ishga tushirish uchun taxminan bir yil muddat kerak bo‘lishini aytdi.

Belgiya 108 mln dollarni O‘zbekistonga qaytarmoqchi

Belgiya hukumati korrupsiya va pul yuvish bilan bog‘liq jinoyatlar doirasida musodara qilingan 108 million dollarni O‘zbekistonga qaytarishga tayyorgarlik ko‘rmoqda. Bryussel prokuraturasi O‘zbekiston hukumatining iltimosi asosida 200 million dollarlik aktivlarni musodara qilgan. Bu mablag‘lar kimdan olingani yoki qaysi jinoyat ishi doirasida ekani ochiqlanmagan.

Prokuratura bayonotiga ko‘ra, bu xalqaro huquqiy yordam so‘rovi BMTning Korrupsiyaga qarshi konvensiyasi asosida amalga oshirilgan. Bryussel sudi YeI davlatlari o‘rtasidagi aktivlar taqsimoti qoidalari asosida 108 million dollarni O‘zbekistonga berishga qaror qilgan.

Avvalroq, Adliya vazirligi Gulnora Karimovaga aloqador jinoiy guruhning Belgiyadagi aktivlari yuzasidan ishlar olib borilayotganini bildirgan edi. Hozirda 1,3 milliard dollarlik aktivlarni qaytarish bo‘yicha keng qamrovli harakatlar davom etmoqda.

O‘zbekistonda chigirtka tarqalish xavfidan ogohlantirish

O‘simliklar karantini va himoyasi agentligi 2025 yilda 608,1 ming gektar yerda chigirtka tarqalishi kutilganini ma’lum qildi. Ayni paytda Qashqadaryo, Surxondaryo va Samarqand viloyatlarida zararli chigirtkalarga qarshi kurash ishlari olib borilmoqda.

22 martdan buyon 5468 gektar maydonda kimyoviy tadbirlar amalga oshirilgan. Bu ishlarda 30 ta otryad va 276 mutaxassis ishtirok etmoqda. Jizzax viloyatida ham kurash ishlari boshlangan.

O‘zbekistonda chigirtkalarning 200 ga yaqin turi bor, ulardan 6–8 turi hosilga katta zarar yetkazishi mumkin.

Oman Air Toshkentga muntazam qatnovlarni yo‘lga qo‘yadi

Oman Air aviakompaniyasiga Masqat–Toshkent–Masqat yo‘nalishida muntazam parvozlar amalga oshirish uchun rasmiy ruxsatnoma berildi. Bu haqda «O‘zaviatsiya» agentligi xabar berdi.

Ruxsatnoma 2025 yil 2 aprel kuni rasmiylashtirilgan va O‘zbekiston hamda Ummon o‘rtasidagi havo qatnovi to‘g‘risidagi hukumatlararo bitim asosida taqdim etilgan.

Mazkur reyslar ikki mamlakat o‘rtasida turizm, savdo va ishbilarmonlik aloqalarini rivojlantirishga xizmat qilishi kutilmoqda.

2 oyda 4,4 mingdan ortiq avto import qilindi

O‘zbekiston 2025 yilning yanvar-fevral oylarida xorijdan 4 415 ta yengil avtomobil import qildi. Bularning umumiy qiymati 75,9 mln dollarni tashkil etdi.

Milliy statistika qo‘mitasiga ko‘ra, avtoimportda asosiy ulush Xitoyga to‘g‘ri kelgan — 3149 dona. Shuningdek, Koreya Respublikasidan 1191 dona, Yaponiyadan 32, Germaniyadan 11, AQSh va Meksikadan 8 tadan avto olib kirilgan.