China Southern Airlines O‘zbekistonga parvozlar sonini ko‘paytiradi

Hozir aviakompaniya Toshkentdan Pekinga va Toshkentdan Urumchiga parvozlarni amalga oshirib kelmoqda.

Foto: Getty images

Xitoyning China Southern Airlines aviakompaniyasi O‘zbekistonga parvozlar sonini oshirishni rejalashtirmoqda. Bu haqda Uzbekistan Airports xabar berdi.

Qayd qilinishicha, Uzbekistan Airports va China Southern Airlines kompaniyasi o‘rtasida muzokaralar bo‘lib o‘tgan. Uchrashuvda hamkorlikni yanada rivojlantirish masalalari, mavjud reyslar sonini oshirish va O‘zbekiston aeroportlariga yangi yo‘nalishlar ochish imkoniyatlari muhokama qilingan.

Ta’kidlanishicha, mavjud yo‘nalishlar chastotasini haftasiga yetti martagacha oshirish masalasi ko‘rib chiqilmoqda. Hozir China Southern Airlines aviakompaniyasi Toshkentdan Pekinga (haftasiga 4 marta) va Toshkentdan Urumchiga (haftasiga 5 marta) parvozlarni amalga oshirib kelmoqda. Shuningdek, Uzbekistan Airports kompaniyasi Andijon, Namangan va Farg‘ona aeroportlaridan Xitoy shaharlariga yangi yo‘nalishlarni ochishni taklif qilgan.

China Southern Airlines — Guanchjou shahrida joylashgan aviakompaniya bo‘lib, mahalliy, mintaqaviy va xalqaro reyslarni amalga oshiradi.

#Xitoy #China Southern Airlines #aviaqatnov