Namanganda mebel ustaxonasida yong‘in chiqdi

Yong‘in oqibatida kuyib, tan jarohati olganlar kuzatilmagan. Hozirda holat yuzasidan tergovga qadar surishtiruv ishlari olib borilmoqda.

Foto: Namangan viloyati FVB

Namangan viloyati Favqulodda vaziyatlar boshqarmasi Yangi Namangan tumanida sodir bo‘lgan yong‘in yuzasidan ma’lumot berdi.

Qayd etilishicha, 20 fevral kuni Namangan shahar FVBga soat 18:39 larda Yangi Namangan tumani Go‘zal MFYda joylashgan yakka tartibdagi tadbirkorga qarashli mebellarni qayta ta’mirlash ustaxonasida yong‘in sodir bo‘layotgani haqida xabar kelib tushgan.

Xabarga asosan yong‘in-qutqaruv ekipaji hodisa joyiga soat 18:47 da yetib borgan va yong‘in soat 19:00 da to‘liq bartaraf etilgan.

Yong‘in oqibatida binoning shift va tom qismidan 25 metr kvadrat joyi yonib zararlangan. Qutqaruvchilar tomonidan 70 metr kvadrat joy saqlab qolingan.

«Sodir bo‘lgan yong‘in oqibatida kuyib, tan jarohati olganlar kuzatilmadi. Hozirda sodir bo‘lgan yong‘in yuzasidan tergovga qadar surishtiruv ishlari olib borilmoqda», — deyiladi xabarda.

#Namangan #yong‘in