Buxoro shahridagi avtomobil ehtiyot qismlari do‘konida portlash sodir bo‘ldi. Bir kishi halok bo‘lgan

Portlashga do‘kon yerto‘lasida gaz-havo aralashmasi sabab bo‘lgani taxmin qilinmoqda. Portlash oqibatida 1-qavatning 2 dona beton plitasi qulab tushgan.

Foto: Videodan kadr

Buxoro shahridagi savdo do‘konlaridan birida portlash sodir bo‘lgan. Bu haqda FVV matbuot xizmati xabar bermoqda.

Ma’lum qilinishicha, bugun, 1 mart kuni soat 8:57larda Buxoro shahri, “Yoshlik” MFY, Alpomish ko‘chasida joylashgan 2-qavatli binoning 1-qavatidagi avtomobil ehtiyot qismlari do‘konida chaqnash sodir bo‘lgan. Bunga do‘kon yerto‘lasida gaz-havo aralashmasi sabab bo‘lgani taxmin qilinmoqda.

Chaqnash oqibatida 1-qavatning 2 dona beton plitasi qulab tushgan. Hozirda chaqnash sababi va zarari aniqlanmoqda. Voqea joyida yong‘in sodir bo‘lmagan.

Dastlabki ma’lumotlarga ko‘ra, hodisa oqibatida 1 nafar fuqaro voqea joyida xalok bo‘lgan hamda yana 1 nafar fuqaro turli darajadagi tan jarohatlari bilan shifoxonaga yuborilgan.

Voqea joyiga viloyat va shahar FVB rahbariyati hamda yong‘in-qutqaruv ekipajlari, IIB, prokuratura, “Hududgazta’minot” va Sog‘liqni saqlash boshqarmasi xodimlari chiqishgan.

Holat yuzasidan dastlabki tergovoldi surishtiruv ishlari olib borilmoqda.

#portlash #Buxoro #do‘kon