«Manchester Yunayted» hujumchisi Krishtianu Ronaldu va «PSJ» hujumchisi Lionel Messining birgalikda tushgan surati kompyuter dasturida yasalgan bo‘lib chiqdi.
Avvalroq, futbolchilar ijtimoiy tarmoqlarida Louis Vuitton brendining reklama kampaniyasi aks etgan suratini joylashtirishgan edi. Unda superyulduzlar jomadon ustida shaxmat o‘ynab o‘tirgani aks etgan.
Ronaldu va Messi tomonidan ijtimoiy tarmoqdagi sahifalarida bir vaqtda joylashtirgan surat juda uyg‘un ko‘rindi. Ammo keyinchalik ma’lum bo‘lishicha — montaj mahsuli.
Reklamani suratga olish jarayoni videosini tomosha qilgach aynan shunday xulosaga kelish mumkin. Unda futbolchilar bir-biridan alohida tarzda suratga tushishgan.
Ommaviy axborot vositalarida «futbol tarixidagi eng zo‘r futbol surati» deb atalgan fotoni bir necha soatlar ichida 20 milliondan ortiq odam tomosha qilgan edi.
Krishtianu Ronaldu va Lionel Messi mos ravishda Portugaliya va Argentina milliy jamoasi tarkibida Qatardagi jahon chempionati ishtirokchisi sanaladi.
