Yer berildimi, daromad topguncha o‘rgatishimiz kerak – prezident yoshlarga ajratilayotgan yer maydonlariga to‘xtaldi

«Bu sohada ham yoshlarimizni yerdan daromadga kirishgacha bo‘lgan davrda «ustoz va shogird» tizimi joriy qilinib, fermer, klaster hamda sektor rahbarlari yoshlarga amaliy yordam ko‘rsatishi shart.

Bu borada, respublika bo‘yicha 21ta tumanda 2 mingdan 4,5 ming nafargacha yoshlarga dehqonchilik uchun yer ajratilgan. Amudaryo va Baliqchi – 4 ming nafardan ziyod, Mingbuloq, Yangiyo‘l, Shahrixon – 3 mingdan, Do‘stlik, Bekobod, Bog‘ot – 2,5 mingdan ortiq.

Lekin, 20ta tumanda bu ko‘rsatkich 300 nafarga ham yetmaydi. Boysun – 55ta, Qorovulbozor – 102ta, Qiziriq – 120ta, Bo‘stonliq – 150ta, Termiz tumani – 179ta, Samarqand, Ohangaron va Yuqori Chirchiq tumanlari – 205tadan, Yangiobod va G‘uzor – 215tadan, Zangiota va Buxoro tumanlari – 230tadan, Angor, Bandixon va Zafarobod – 260tadan, Quyi Chirchiq, Muborak va Toshkent tumanlari – 265tadan.

Yer berishning o‘zi bilan ish bitmaydi, uni daromad olguncha o‘rgatishimiz kerak. Yer aldovni kechirmaydi», – dedi davlat rahbari.

Yig‘ilishda ishtirok etgan Amudaryo tumani hokimi Sultonboy Yuldashev yoshlarga ajratilgan yerlardagi agrotexnik tadbirlar, kutilayotgan hosil, uning bozori va bu borada kelgusidagi rejalarini tushuntirdi.

«Yoshlarimizga 1, 0,5, 0,3 gektardan yer bo‘lib berdik. Yana budjetdan tashqari mablag‘larimiz hisobiga maktablarning boshlang‘ich sinf o‘quvchilariga autsorsing asosida nonushta tashkil qildik. Kelgusida bunday maktablar qamrovini kengaytirmoqchimiz», – dedi tuman hokimi.

Prezident bu tashabbusni qo‘llab-quvvatladi va parrandachilikni rivojlantirish hisobiga bolalarga tuxum ham yetkazish sog‘likka foydali ekanligini ta'kidladi.