AQShda muxbir jonli efirda hibsga olindi  

Voqea oxirgi kunlarda tartibsizliklar bilan qamrab olingan Minneapolis shahrida yuz bergan. Omar Ximens “Yangi kun” dasturi efirida yuz berayotgan tartibsizliklar haqida so‘zlayotganda, uning yoniga politsiyachilar kelib, dastur boshlovchilari va millionlab teletomoshabinlar ko‘z o‘ngida uni hibsga olishgan. Ular muxbirning nima uchun hibsga olinayotgani haqidagi savoliga javob berishmagan. Yuz berayotgan voqeani CNN’ning suratga olish guruhi operatori kameraga qayd qilgan.

Keyinroq CNN matbuot xizmati Twitter’da suratga olish guruhining qolgan a'zolari ham hibsga olinganini ma'lum qilgan.

Minneapolis shahrida Jorj Floyd ismli afroamerikalik erkak politsiyachilar tomonidan ushlanish vaqtida o‘ldirilgandan keyin ommaviy noroziliklar boshlangan. Minneapolis meri AQSh prezidenti Donald Trampdan shaharga milliy gvardiya kuchlarini kiritishni so‘ragach, Minneapolis, Sent-Pol shaharlari va yaqin atrofdagi aholi punktlariga tartibsizliklarni bostirish uchun milliy gvardiyaning 500 jangchisi yuborilgan.