Avtomobil ishlab chiqaruvchilar aprel oxirigacha 100 mlrd dollardan ortiq mablag‘ yo‘qotishi mumkin

Agarda Shimoliy Amerika va Yevropadagi avtomobil ishlab chiqaruvchilar ishlab chiqarishni qayta tiklamasa, ular 100 mlrd dollardan ortiq mablag‘ yo‘qotishi mumkin. Bu haqda AutoAnalysis tadqiqot kompaniyasi rahbari Yan Genriga tayanib Financial Times yozmoqda.

Bunda Yevropadagi yo‘qotishlar 66, Shimoliy Amerikadagi yo‘qotishlar 52 mlrd dollarga yetishi mumkin.

Genrining so‘zlariga ko‘ra, ishlab chiqarishning to‘xtab turishi oqibatida soha Yevropada haftasiga 8 va Shimoliy Amerikada 7,5 mlrd dollar yo‘qotmoqda. 

Avvalroq yirik avtoishlab chiqaruvchilar o‘z korxonalari faoliyatini boshlashni ortga surgandi. Bunda Nissan, Ford va General Motors ishlab chiqarish qachondan boshlanishini aniq aytmadi. 

Avtokompaniyalar yuz minglab ishchilariga vaqtincha javob berib yuborgan.

O‘tgan oyda G‘arbiy Yevropada avtomobillar savdosi 60 foizga pasaygan. AQShda esa avtomobil sotish hajmi keyingi 10 yildagi eng past ko‘rsatkichni qayd etgan. Aprelda cheklov choralarining davom etishi va dilerlik markazlarining yopilishi tufayli pasayish yanada yuqori bo‘lishi kutilmoqda.